香港人這幾年好像愈來愈關注舊社區的營造，特別是小店這回事。不論是雜誌、報紙，還是電視、網媒、Facebook，都有許多關於舊區重建發展、租金暴漲、時代變遷，令到地區小店文化和傳統手作開始逐一消失的故事。現在人人都懂得說，連鎖店怎樣進佔全港，令一間又一間的小店變得越來越罕有，必須保護大家的集體回憶云云。
小店獨有的新聞價值，引來記者的興趣來訪問，這無可厚非。當訪問出街後，引來讀者迴響，小店前出現長長的人龍；這時，我不其然想，到底這些「突如其來」的關注，是代表香港人真的明白社區規劃的重要性，還是來「趁墟」，看了報道便來趁趁熱鬧而已？我們是在「呃like」和「打卡」，還是真正開始投入社區生活呢？
我記得2011年，地鐵還沒有通車，西環還未變天，我家附近一間中式甜品老店最後一天營業。作為老主顧，我當然有去幫襯。多年來，這店內一直只賣西米露、喳喳等傳統中式糖水，客人一窩蜂在最後一天來光顧，老闆忙得不可開交。此時，竟有人特意走來跟老闆說：「我要楊枝甘露」。老闆表情詫異，開業這麼多年來也沒有人問過這裡有沒有楊枝甘露賣，令人啼笑皆非。「新客仔」只是看完報道介紹後，來看看究竟，並沒有真實去了解店舖周邊的環境和氛圍。
到底這種幫襯，老闆是會覺得困擾，還是無任歡迎呢？這就是我心裏面的問題。
我找了四間小店老闆做訪問，了解媒體報道後，引發而來的「趁墟」熱潮，會為他們帶來什麼改變？
＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿
李湛記織補 1940 年開業
2013年接受過蘋果日報訪問 (http://hk.apple.nextmedia.com/news/art/20131003/18448449)
2014年接受過香港電台、AM730訪問 (http://www.am730.com.hk/article-198269)
李伯伯已經81歲了，他仍然堅持在東邊街的一條巷子裏當織補，不願退休。從前的人，衣服褲子破了洞，會到織補店找師傅處理，然後繼續穿上十年八載。織補是個特別的傳統行業，故亦有很多的媒體和朋友來看看李伯伯。
「後生仔根本唔知道有一種咁嘅行業，就算有嘢爛咗都唔知係邊度整。有好多睇到報道後，知道有呢個行業，咪特登拎嘢嚟俾我整！」
Q：你認為有媒體報導到底是好還是壞？
李伯伯：好事嚟嘅！多咗生意做！
Q：這個熱潮維持了多久？
李伯伯：都有幾個月。
Q：報道後你的工作量會不會太多？令你應付不暇？
李伯伯：會架！試過一日就做到$6000生意，特別係有報道出咗街後。嘩！我做唔到咁多呀真係！
Q：有沒有婉拒他們啊？
李伯伯：有啊，話俾佢哋聽我太多單，做唔起咁多。我驚添呀！如果生意多過頭我驚做唔切！呢啲手作嘢，一日做唔到好多架嘛。我真係驚起唔到貨比人！咪同啲客講叫佢哋去第二度做，或者等下先，遲啲先拎嚟囉，我呢度太多單會做唔切，個個一齊湧埋嚟我真係無時間做！
Q：覺得現在有了通訊科技後有什麼轉變？
李伯伯：以前多數都係左鄰右里嘅街坊幫襯，其他人都唔知，唔識得嚟。但而家個個都容易知道消息，就變咗好多好遠地方嘅人都會嚟囉。試過有澳門，羅湖嘅過嚟。早幾個月咋嘛，有人係新加坡打嚟話拎嘢嚟香港要我幫佢整呀。
正佳鞋 1982年開業
2014年與長春社文化古蹟資源中心合作 「巷里傳承」西營盤歷史文化徑計劃
2015年接受過蘋果日報、東方日報和壹週訪問 (http://hk.apple.nextmedia.com/supplement/special/art/20150619/19189493)(http://m.on.cc/nc/hknews/20150725/20150725090013lc.html)
正佳鞋在今年8月榮休結業，多年來都是賣學生皮鞋為主。當店外貼上一張紅紙告知街坊結業的消息後，有人拍照放上網絡廣傳，客人對鞋店的依依不捨引來媒體報道，吸引讀者紛紛前來探望他們，順便前來與老闆和老闆娘話當年，買一對合心的皮鞋留念。
「我哋啲客好好架，全部都好nice！佢哋都話『我年年都唔使周圍去搵學生鞋，嚟你呢度乜都有樣樣有齊晒架啦，咁就唔使擔心啦！』好多人都認為係因為租金加咗，所以我哋要結業，叫我哋繼續做落去。但實際係因為我哋兩個年紀真係大啦。」
Q：為何會接受訪問？
陳老闆：做咗咁耐，退休緊係要通知啲客同街坊。啲街坊都係想知我哋點樣經營，點樣開始。見你哋咁有誠意，我又唔好意思拒絕。
Q：媒體報導後跟以前有什麼不同？
陳老闆：多咗好多舊客過嚟，提前嚟買學生鞋。又勾起咗佢哋啲回憶，同我哋敘下舊咁。有啲人會同我哋講：「咦！我細細個曾經都係呢度幫襯過喎，呢間舖仲係度！」又問我哋記唔記得，我哋邊記得你哋啲樣呀！見得多大家咪當朋友咁傾吓偈。
Q：有沒有新客到來？
陳老闆：多咗好多生客知道我哋清貨過嚟買！
Q：你如何分辨新舊客？
陳老闆：有啲會半信半疑，咁我咪睇得出佢係外來人，姐係佢對我哋啲鞋個信心都無咁大。幫襯開個啲人就唔使問啦！「比一對我！」、「嗯！得啦！」，佢哋一出聲我就知架啦！
Q：你覺得現在有媒體的報導跟從前有什麼不同？
陳老闆：而家又推動嘅作用囉！推動嘅意思唔係話我賣多咗，而係一個關注社區嘅變化。好似以前，啲舖頭靜悄悄咁就消失咗。但係而家個媒體咁發達，就好似大家（都知道）又消失咗一間小店。
Q：你認為媒體的報導是不是一件好事？
陳老闆：好！好事！可以鼓勵下啲後輩要堅毅啲做嘢！
（2015年8月9日，正佳鞋正式榮休結業。）
先進鐘錶行 1986年開業
2013年接受過蘋果日報、文匯報訪問 (http://paper.wenweipo.com/2013/02/09/YO1302090013.htm)
2014年接受過蘋果日報、叱吒903《Urban Touch》訪問，與長春社文化古蹟資源中心合作
(http://green.appledaily.com/feature/20140513/3394155/%E8%80%81%E9%8C%B6%E8%A1%8C%E5%9B%9E%E6%86%B6-%E7%A2%BC%E9%A0%AD%E5%B7%A5%E6%88%B4%E9%87%91%E5%8B%9E)
2015年接受過蘋果日報訪問
(http://hk.apple.nextmedia.com/news/art/20150125/19015570)
先進鐘錶行除了做鐘錶銷售和修理外，兼做補鞋和配鎖匙生意。在2013年，因業主突然不續租，被逼結業，加上鐘錶行業式微，故引來媒體來報道。在去年底他搬去轉角的新舖，租金比從前大增。加上西港島線開通，影響了西環一帶的店舖租金，小店相繼結業。不禁令張老闆擔心未來能否「捱下去」。
「有人會同我講『我睇完報紙訪問你，特登拎啲舊錶嚟比我整。』，我呢啲街坊生意，都唔係有咩太大轉變，就算係都係飲食業會多啲。佢哋都係嚟拎啲嘢比我整，望下我哋變成點，傾下偈咁。」
Q：為何會接受訪問？
張老闆：無咩所謂嘅，佢哋嚟都係問我租金同生意近況，仲有之後地鐵嚟有咩影響。我咪答下佢，傾下偈。
Q：報道後有什麼不同？
張老闆：有少少啦，多咗人過嚟睇下，行下咁。啲新客係睇完報道特登過嚟補鞋整錶，住元朗都嚟。又有啲舊街坊以前住西環，搬走後特登返嚟睇下西營盤原來變得咁快咁犀利，過嚟傾下閒偈。
Q：有無年青人過嚟想學嘢？
張老闆：有啊，佢哋都係好奇啫。有啲問過請唔請學徒，不過呢啲行業都過時啦，搵唔到食學嚟做咩呢？以前就唔同啦，差唔多好似而家啲手機咁，個個都有隻錶係手架。而家啲人睇時間用手機睇都得啦。況且呢啲技巧唔係一兩日就學到，起碼幾年先得呀。
Q：現在生意如何呀？
張老闆：呢啲街坊生意，差唔多啦。而家手作過時架啦，有得做咪做，無就執架啦。時代唔同，隨時都可以冇得做。
Q：你認為有媒體報導到底是好還是壞？
張老闆：呢啲嘢好講時勢，好難講好定壞。
德昌森記蒸籠 1900年初開業
2010年接受過CNN訪問
(http://travel.cnn.com/hong-kong/life/dim-sum-hong-kong-where-steam-baskets-are-labor-love-304442)
2014年接受過蘋果日報、香港電台訪問、與長春社文化古蹟資源中心合作(http://hk.apple.nextmedia.com/supplement/food/art/20141214/18966877)
2015接受過東方日報、明報訪問
(http://ol.mingpao.com/php/cultureleisure3.php?nodeid=1435548208787&subcate=culture&issue=20150327)
德昌森記的蒸籠最為人熟悉了，是香港茶樓最主要的點心蒸籠來源。來到現在，林老闆已經是德昌森記的第五代傳人。他們每天都會準時開閘，埋頭苦幹地工作。店門旁放了很多用竹製成的筆筒、筷子、小蒸籠、筲箕等小手作給遊人購買。
「從前都有好多手工行業，例如係織掃把。但因為以前冇媒體，所以先冇乜人知。而蒸籠呢樣嘢夠特別，先會有價值去報導。話俾大家知香港傳統手作係點製造出嚟。」
Q：為何會接受訪問？
林老闆：佢哋都係想介紹返舊式嘅傳統手作，因為啲手作真係越來越少啦。可以介紹返蒸籠比大家認識。
Q：訪問出來後，你的生活有沒有轉變？
林老闆：無架，我每日都係係度整蒸籠。只係生意多咗，嚟睇我哋嘅人都多咗。
Q：有沒有預計過報道出來後的效果？
林老闆：都有預計過。我接受過電視、電台、報紙雜誌，甚至係學生做的訪問。每次都會有唔同程度嘅影響。就算唔一定係生意多咗，都會多咗啲人特登行過，睇下我哋做緊咩。「呀！原來呢間比XX報紙訪問過喎」咁樣。
Q：有沒有人曾經來拍照然後離開？
林老闆：都有。係門口影張相嘅人多咗，好似「到此一遊」，「最近有人報導過，而家我嚟到呢度，原來真係有間咁嘅嘢」咁。
Q：這股熱潮出現了多久？
林老闆：其實呢10年8年嚟睇嘅人真係多咗，但都好平均，唔會話突然多咗好多人嚟。況且除咗媒體外，我認為地鐵效應都係其中一個因素。所以無咩熱潮出現。但因為呢幾年真係多咗好多人，任何年紀、任何媒體都會想訪問我哋。但始終，會影響到我哋做嘢。我哋做手作，如果花太多時間去接受訪問或者做其他事，我哋就會做唔到嘢。嚴格啲黎講係會『搵唔到食』。
Q：那麼你們會如何應對？
林老闆：咁報道都唔算係一種騷擾。我哋需要找尋適合自己嘅嘢，如果得一段時間得閒嘅，就會係個段時間盡量做晒所有關於訪問既野，唔得閒就會叫記者第二日先。（記者）更加要明白，手作仔一開始做之後，就唔會想再搞其他嘢，因為咁樣就會起唔到貨。
Q：你認為有媒體報導到底是好還是壞？
林老闆：好事嚟嘅！因為個社會發展轉變，呢啲舊有行業都值得關注，令多啲人知道呢個行業。以前有好多學生同年青人都唔知原來蒸籠係用竹做。而家直接出咗畫面，真係會好清楚知道一支筆直嘅竹，係點樣可以整成圓圓嘅蒸籠。
＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿
小總結
許多時候，我們對小店的處境有很多想像，特別是媒體不斷傳來業主大幅加租、收舖、或是被大財團收購、壟斷的消息和傳聞。突擊訪問這四間特別的小店後，我才知道老闆們被大眾傳媒報道後的真實影響。他們大都認為媒體的報導有其好處，就算是報道帶來「呃like」、「打卡」的人們，也不會太麻煩，畢竟他們的出發點都是好的。好似林老闆所講，大家至少認識對舊行業多一點。
他們也提醒我，無論我有多喜愛小店，也不能太一廂情願，把自己的意願投射到經營者身上，一味支持他們做下去。就好像正佳鞋的故事，有人認為他們結業，是因為西環大幅加租。但實際原因是老闆和老闆娘年紀老邁，想退休了才需要結束鞋店。若他日自己的兒子有興趣的話，他們會東山再起，重新掛上「正佳鞋」的招牌。真正了解他們的想法，支持和感謝他們在社區的位置，或許才是最好的態度。
而蒸籠店的林老闆和織補店的李伯伯，也提醒我要尊重手作人的尊嚴。媒體報道確實有為他們帶來更多客人，但手作的品質和對客人的承諾比什麼都還重要。他們都不知道自己將來會變成怎樣，「做得就做」。他們渴望的，與其說是更多客人，不如說是有繼承者接續手藝。如果我們真的支持小店和傳統工藝，除了去拍照、記錄，或者也可以想想，可以怎樣從他們身上學懂這些傳統工藝？
另外一點要記下來的是，訪問後，我給老闆們看看早前被刊登了出來的訪問，他們都感到非常詫異，有些說家人會替他把訪問收藏紀念，有些亦說沒有從看過自己的訪問。「嘩，佢哋啲相影得好靚喎」，「估唔到佢會咁寫，哈哈」，他們的反應令我想起區家麟在專欄的一句話：「我們的被訪者大部分是平常人，一生人可能沒見過多少記者。我們訪問，找人談天，是工作的一部分；人們接受訪問，有機會上電視、上報紙，對很多人而言，是天大的事。」
訪問後，我常常也有掙扎，總覺得自己會不會也是「消費」了小店就算？這些店，都在我生活的社區裏，平常見到老闆又應該怎樣打招呼呢？
後來，我搞清楚，其實我是在問自己同一條問題：當我們去幫襯／關注小店時，是一剎那的衝動，還是真真正正學習把社區納入自己關心，願意付出的範圍？
我做這個小報道是希望，我們不只是去「呃like」、「打卡」，不是在店舖結業時才去惋惜一番，但在日常生活中卻是頻頻光顧連鎖店（可看香港Youtuber「一字馬」向九龍城「合成士多」致敬的影片http://youtu.be/EC1gFKJYQYc）。我希望，自己可以做實事，改變日常生活，不「講一套，做一套」。做記者寫報導可以引起關注，提醒大家小店的價值，但改變現實的動力，還是要靠自己身體力行。
自己的香港，自己來守護。不論你的角色身份是誰，平日跟街坊打個招呼，多跟小店老闆吹吹水，衍生出來的社區營造力可能比媒體的報導還要強。
最後，很遺憾這次因時間不足，沒有找到飲食行業的朋友們談談媒體報導的影響，我同意鐘錶行張老闆的看法，飲食業是最受影響的行業。一群人看了網絡上的介紹，或是媒體的飲食推介後，一窩蜂去試試新美食。那股熱潮能維持的時間很短，對他們最影響卻是最深。
Text + Photo/ Da
Edit/ Dydy
實習生小profile：
Da，新傳系學生，一小步的實習小薯仔，有二十年「西柚」年資。咩都唔識，淨係識「落地」遊走，最討厭「堅離地城」。
有關實習生的專欄，可看〈實習生的實驗：解答我們心裏面的問題〉